Vaċċini kontra l-COVID-19
L-UE hija responsabbli biex tiżgura li vaċċini siguri u effettivi kontra l-COVID-19 jaslu għand il-pubbliku fl-UE/fiż-ŻEE. Il-Kummissjoni Ewropea tawtorizza l-vaċċini kontra l-COVID-19, wara evalwazzjoni mill-Aġenzija Ewropea għall-Mediċini (EMA) u konsultazzjoni mal-Istati Membri tal-UE. L-ewwel vaċċini ngħataw fit-tmiem tal-2020.
Kif jaħdmu l-vaċċini kontra l-COVID-19
Il-vaċċini kontra l-COVID-19 jipprevjenu l-COVID-19 billi jiskattaw reazzjoni immunoloġika.
Il-parti l-kbira tal-vaċċini kontra l-COVID-19 jiskattaw dawn ir-reazzjonijiet immunoloġiċi għal framment żgħir ta’ SARS-CoV-2. SARS-CoV-2 huwa l-virus li jikkawża l-marda tal-COVID-19.
Jekk persuna li tkun irċeviet vaċċin kontra l-COVID-19 tiġi infettata mill-virus aktar tard, is-sistema immunitarja tagħraf il-virus.
Minħabba li diġà hija lesta biex tattakka l-virus, is-sistema immunitarja ta’ dik il-persuna tkun tista’ tipproteġiha mill-marda tal-COVID-19.
Ara aktar informazzjoni dwar Kif jaħdmu l-vaċċini.
L-iżvilupp u l-approvazzjoni tal-vaċċini kontra l-COVID-19
Il-vaċċini kontra l-COVID-19 qed jiġu żviluppati skont l-istess rekwiżiti legali għall-kwalità, is-sigurtà u l-effikaċja bħal dawk għall-vaċċini l-oħra kollha.
Bħall-vaċċini kollha, l-effetti tal-vaċċini kontra l-COVID-19 jiġu ttestjati l-ewwel fil-laboratorju, inkluż fuq l-annimali, u mbagħad fuq voluntiera umani.
L-Aġenzija Ewropea għall-mediċini (EMA) tevalwa l-vaċċini kontra l-COVID-19 mal-istess standards għoljin bħal dawk għall-vaċċini l-oħra kollha qabel ma jkunu jistgħu jiġu rilaxxati għall-użu. Aqra aktar dwar l-Approvazzjoni tal-vaċċini fl-Unjoni Ewropea.
Dak li huwa differenti għall-vaċċini kontra l-COVID-19 huwa li l-iżvilupp u l-approvazzjoni huma ħafna aktar mgħaġġla, b’rispons għall-emerġenza tas-saħħa pubblika kkawżata mill-virus.
L-EMA qed tevalwa applikazzjonijiet ta’ kwalità għolja minn kumpaniji li qed jiżviluppaw il-vaċċini kontra l-COVID-19 fl-iqsar żmien possibbli, filwaqt li tiżgura li d-deċiżjonijiet tagħha jibqgħu robusti. Tagħmel dan billi:
- tipprovdi gwida biex tgħin lill-iżviluppaturi tal-vaċċini kontra l-COVID-19 iħejju għall-applikazzjoni tal-approvazzjoni;
- tuża proċeduri ta’ rieżami rapidi;
- tivvaluta d-data ewlenija dwar il-vaċċini kontra l-COVID-19 hekk kif issir disponibbli.
Il-monitoraġġ tas-sigurtà u l-effikaċja tal-vaċċini kontra l-COVID-19
L-UE timmonitorja kontinwament is-sigurtà u l-effikaċja tal-vaċċini kontra l-COVID-19.
L-EMA timmonitorja l-effetti sekondarji ta’ dawn il-vaċċini, kif tagħmel għall-vaċċini kollha.
B’mod parallel, iċ-Ċentru Ewropew għall-Prevenzjoni u l-Kontroll tal-Mard (ECDC) jimmonitorja b’mod intensiv l-effikaċja tal-vaċċini kontra l-COVID-19.
B’hekk l-UE tkun tista’ tidentifika u tevalwa fil-pront informazzjoni ġdida li jkun hemm dwar il-benefiċċji u s-sigurtà tal-vaċċini kontra l-COVID-19. Dan jiżgura li kwalunkwe riskju possibbli jiġi identifikat u ġestit malajr kemm jista’ jkun: ara Il-monitoraġġ tas-sigurtà tal-vaċċini u r-rapportar ta’ effetti sekondarji.
Vaċċini awtorizzati għall-użu fl-Unjoni Ewropea
Bimervax
Bimervax fih proteina prodotta fil-laboratorju li tikkonsisti minn parti mill-proteina spika tas-SARS-CoV2 mill-varjanti tal-virus Alpha u Beta.
Comirnaty (BioNTech/Pfizer)
Comirnaty fih molekula msejħa messaġġiera RNA (mRNA) bi struzzjonijiet għall-produzzjoni ta’ proteina minn SARS-CoV-2, il-virus li jikkawża l-COVID-19. Comirnaty jiġi wkoll bħala żewġ vaċċini adattati.
Jcovden (Janssen-Cilag)
Jcovden huwa magħmul minn virus ieħor (tal-familja ta’ adenovirus) li ġie modifikat biex jinkludi l-ġene li tipproduċi proteina li tinstab fuq SARS-CoV-2.
Nuvaxovid (Novavax)
Nuvaxovid fih verżjoni ta’ proteina li tinsab fuq il-wiċċ ta’ SARS-CoV-2 (il-proteina spika), li ġiet prodotta fil-laboratorju.
Spikevax (Moderna)
Spikevax fih molekula msejħa messaġġiera RNA (mRNA) bi struzzjonijiet għall-produzzjoni ta’ proteina minn SARS-CoV-2, il-virus li jikkawża l-COVID-19. Spikevax ma fihx il-virus innifsu u ma jistax jikkawża l-COVID-19. Spikevax jiġi wkoll bħala żewġ vaċċini adattati.
Valneva (Valneva)
Il-vaċċin fih partikuli sħaħ tar-razza oriġinali ta’ SARS-CoV-2 (il-virus li jikkawża l-COVID-19) li ġie inattivat (maqtul) u li ma jistax jikkawża l-marda.
Vaxzevria (AstraZeneca)
Vaxzevria huwa magħmul minn virus ieħor (tal-familja adenovirus) li ġie modifikat biex ikollu fih ilġene għat-tiswir ta’ proteina mis-SARS-CoV-2.
VidPrevtyn Beta (Sanofi Pasteur)
VidPrevtyn Beta fih verżjoni ta’ proteina li tinsab fuq il-wiċċ ta’ SARS-CoV-2 (il-proteina spika tal-virus li tikkawża l-COVID-19), li ġiet prodotta fil-laboratorju.
Kontenut relatat
COVID-19
Fatti ewlenin dwar il-COVID-19, is-sintomi, il-kumplikazzjonijiet, il-COVID-19 fit-tul, kif tinxtered, u l-fatturi ta’ riskju.
Infografika
Infografika - Kif il-vaċċini abbażi ta' proteini jaħdmu kontra l-COVID-19
Din l-infografika tispjega kif il-vaċċini abbażi ta’ proteini jaħdmu kontra l-COVID-19.
Infografika
Infografika - Vaċċini abbażi ta’ vettur virali kontra l-COVID-19: kif jaħdmu
Din l-infografika tipprovdi informazzjoni dwar kif jaħdmu l-vaċċini abbażi ta’ vettur virali.
Infografika
Infografika: Kif il-vaċċini mRNA jipproteġuk kontra l-COVID-19
Din l-infografika tipprovdi informazzjoni dwar kif jaħdmu l-vaċċini mRNA.
Infografika
Infografika - COVID-19: Koordinazzjoni tal-UE għal vaċċinazzjoni sikura u effettiva
Kif qed jiġu aċċellerati għall-approvazzjoni l-vaċċini tal-COVID-19?